• [javascript protected email address]

Radyo VKM an dirèk

lapenm

Nou menm fanm kou gason nan Sèk Gramsci, nou pa gen mo pou n eksprime ak ki santiman lapenn, tristès ak doulè nou aprann nouvèl radyotele Kiskeya boule rapye tè nan lannwit 21 desanm 2018 la. Nou pa t vle kwè nouvèl la, nou te panse se yon rèv. Men elas ! Finalman, nouvèl la konfime sosyete ayisyèn nan fè yon gwo pèt : radyotele kiskeya boule. Yon radyo ki gen prèske twa (3) deseni ap batay pou kenbe lespri ak pawòl kritik la byen vivan sou band FM nan. Men tou, radyo kiskeya se youn nan radyo k ap travay pou gen yon sosyete kote moun ka viv tankou moun. Se yon gwo pèt pou peyi a.

Nan kontèks difisil peyi a ye jounen jodi a, radiotele kiskeya se yon zouti enpòtan ki, atravè jounal ak emisyon li yo, ap kontribye nan klere chimen pou pèp ayisyen wè klè kote l ap mete pye l epi pran desten l kòm granmoun. Se yon achiv enpòtan, se yon bibliyotèk peyi a pèdi. Men dife sa a fè nou kwè pi plis toujou nesesite pou batay rekipere lajan petwo karibe a rejim PHTK ak alye yo gagote epi pou gen yon Leta granmoun ki ka jije, arete epi sezi byen ak lajan tout moun ki enplike deprè oubyen delwen nan detounman ak vòlò lajan petwo karibe a. Paske si piyajè-jwisè-kòwonpi PHTK ak alye yo pa t gagote lajan sa a, nou ta gen ta ka gen yon sistèm ponpye solid pou evite dram sa a.

Lè nou aprann non sèlman ponpye vini aprè 2zè men yo pa rive ka fè anyen pou sove patrimwàn sa a ki se yon envestisman prèske twa (3) deseni. Alòs, si nou te gen yon sosyete ki byen ekipe ak yon sistèm ponpye ki reponn ak nòm entènasyonal yo epi ki gen tout mwayen ak ekipman nesesè, nou panse patrimwàn sa a pa ta gentan pèdi. Kidonk, si lajan petwo karibe te byen itilize tankou bay peyi yon sistèm ponpye djanm ki ka reponn ak pwoblèm sa yo, nou ta ka pa nan traka sa a jodi a. E radyo kiskeya se youn pami yon lis viktim byen long nan ka sa a, nou sonje de (2) mache boule youn apre lòt nan mwens pase de (2) mwa. Kidonk, nou panse radyo kiskeya se youn nan viktim modèl Leta bandi-kòwonpi-jwisè-piyajè-oligachik sa a ki tabli l nan peyi depi 17 oktòb 1806.

Anplis, lè nou konnen kisa radyo kiskeya reprezante nan sosyete kòm radyo kritik epi kòman gen yon bann zwazo bèk fè, soti pi wo nivo nan Leta jouk nan souflantyou pouvwa yo, depi sou rejim PHTK-kale tèt premye vèsyon an jis jounen jodi a pa vle wè radyo a. Dayè yo eksprime sa piblikman nan rayisman kont dirijan radyo a tankou Liliane Pierre Paul, yon fanm djanm ki sakrifye l nan batay pou demokrasi nan peyi sa a. Lè nou konsidere ekip sa a (rejim PHTK) se yo menm ankò ki afime tèt yo kòm bandi legal nan peyi a. Lè nou konsidere pozisyon etik ak kritik radyotele kiskeya, tout sa fè nou panse dife ki detwi radyo kiskeya rete trè sispèk. Se poutèt sa nou ap mande pou gen yon ankèt kredib, fyab ak serye ki mennen sou dife a pou detèmine reyèlman nan ki sikonstans sosyete a pèdi patrimwàn sa a.

Nou ap koube nou byen pou nou salye tout ekip radyotelekiskeya. N ap di yo Sèk Gramsci pataje lapenn, tristès ak doulè yo ye jounen jodi a. Nou ap swete tout ekip la kouraj, pa dekouraje. Nou ap salye espesyalman Liliane Pierre Paul ak Marvel Dandin. Nou swete nou fòs ak kouraj nan moman difisil sa a kote nou ta dwe nan vakans fen ane ak fanmi nou epi ap panse kouman kontinye pote kontribisyon nou nan batay pou limyè fèt sou lajan petwokaribe, nan batay pou tabli demokrasi ki kreye kondisyon pou moun viv tankou moun, ki pa redui ak lage bilten nan bwat. FÒS AK KOURAJ POU TOUT EKIP RADYOTELE KISKEYA ! Pou nou fini, nou swete Leta ap pran tout dispozisyon nesesè non sèlman pou limyè fèt sou dife a men tou pou penmèt radyotele kiskeya repran fonksyònman l pi vit posib. Paske sosyete a bezwen yon patrimwàn tankou kiskeya. Nou pwopoze akote enstans piblik ki gen responsabilite pou mennen ankèt sou sitiyasyon sa a pou òganizasyon dwa moun yo ta mennen yon ankèt paralèlman pou ede sosyete a konprann nan ki sikonstans patrimwàn sa a detwi a.

RADYOTELE KISKEYA P AP MOURI, RADYOTELE KISKEYA PA DWE MOURI !

MOUN K AP BATAY PA MOURI !

SÈK GRAMSCI RETE SOLIDÈ AK EKIP RADYOTELE KISKEYA !

NOU PATAJE DOULÈ AK LAPENN EKIP LA !

FÒS AK KOURAJ, PA MOLI !

Pou Sèk Gramsci:

Fritz-Son Lalane                

Jean Joachim Laflèche

 

Ajouter un Commentaire


Code de sécurité
Rafraîchir

OPEN

Thursday - January 17, 2019

Weather: -273°C

Kiyès ki sou sit la

Nous avons 46 invités et aucun membre en ligne

Podcast radio vkm

 

Rechèch