• [javascript protected email address]

Radyo VKM an dirèk

Pou dezyèm jounen manifestasyon, grèv jeneral ak petwo blokaj opozisyon an, lopital la resevwa nan moman nou te la 3 moun ki blese ak bal ak ede plizyè lòt sitwayen rejwenn respirasyon yo, elatriye.

 

Premye viktim lan Wilson Belizè / Wilson Belizaire se yon zele patizan PHTK ki baze dèyè kwa, anpil moun konnen l sou non Chito klamè piblik akize ki tire epi blese jenn gason an nan pye.

 

Daprè enfòmasyon yo Chito ak akolit li yo te vin kwape manifestan yo jan sa te fèt dimanch 18 novanm pase a pou anpeche pwotestatè yo pran wout Ayewopò a ki se wout kay gwo zòtobre rejim PHTK tèt kale tèt la tankou majistra chèf wonflè demisyonè a Jan Gabriyèl Fòtine, depite sikonstriksyon Okay/Ilavach Klovi Oba patizan pouvwa a, delege Depatmantal Sid Maks Sèj Daniel, komisè gouvènman an Remon Bèjo pou n site sa yo.  

 

Pou fòse foul la kase tèt yo, bandi sa yo louvri kout zam sou manifestan yo anba je konplis polisye yo ki pa t ap ni voye gaz oubyen tire anlè yon fason pou ta estope aksyon kriminèl sa yo sou popilasyon sivil la ki te reponn ak kèk kout wòch.

 

Dezyèm viktim lan se Pierre Michel Altidor aka Tidò, 39 lanne ki blese nan nivo pwatrin li ak men dwat li. Temwen ki pale ak VKM di se yon machann bòlèt. Li te kanpe sou pon antre katye popilè Lasinal lè li rele anmwey li pran bal nan moman 2 machin lapolis t ap pase nan zòn lan.Yon teszyèm se yon fanm ki blese nan janm li ak dènye a Lwi Jan Pyè Renèl/ Louis Jean Pierre Renèl 38 lanne ki blese nan pye blòk dèyè kwa limit Nira Varyete.

 

2 nan 3 viktim ki te blese lendi 19 novanm lan jouk jounen jodi pako antre nan sal operasyon ap soufri e depanse sa yo pa t sere ap mande jistis ak reparasyon paske se lapolis ki tire yo.

 

Se andedan yon sant sante dezète, kote prèske tout sèvis pa fonksyone: Administrasyon, direksyon, fanmasi kou lòt fèmen apa sal ijans lan madi 20 novanm 2018 la. Lopital Jeneral Okay sanble nan grèv. Nan sal ijans lan radyo VKM konstate prezans kèk medsen rezidan ak enfimyè k ap eseye ak bout dwèt fè kichoy pou sila yo ki blese anba bal lapolis kou sivil ame san konte sitwayen ki endispoze anba gaz lakrimojèn, blese ak kout wòch oubyen nan aksidan sikilasyon.

 

Lage sou pwòp responsablite pèsonèl viktim yo, direksyon lopital Jeneral la pa pran ka yo ancharj, tout bagay se yo. Se pito pri sèvis yo ki pa sispann ògmante, move jesyon, erè medikal ak koripsyon k ap fè lalwa.

 

Si 3 administrasyon makawon pase yo pa t gagote 3.8 milya dola vèt lajan petwokaribe a, gwo popilasyon an t ap janm nan pile beton an pou mande  arete, jije epi sezi tout byen moun ki gen non yo site nan divès rapò sou zak kriminel ekonomik sa a ak depa prezidan enkilpe a Jovnèl Moyiz.

 

Maks- Enmbèr Marslen, VKM.

Ajouter un Commentaire


Code de sécurité
Rafraîchir

OPEN

Thursday - December 13, 2018

Weather: -273°C

{audio}http://108.178.13.122:8014/listen.mp3.m3u{/audio}

Kiyès ki sou sit la

Nous avons 66 invités et aucun membre en ligne

Podcast radio vkm

 

Rechèch