• [javascript protected email address]

Radyo VKM an dirèk

 
3 manm nan Asosyasyon Machann Mache Fè Okay/ AMMAFO denonse atitid sispèk Lapolis kou Pakè Okay la. Daprè Mari Adlin Ipolit (Marie Adeline Hyppolitr) pòt pawòl, Jezila Reno ( Jesula Renaud) prezidan annaprè a kou Dyefèt Kazimir ( Dieufette Casimir) delege annaprè di yo pa konprann 48 èd tan aprè pa ko gen okenn aksyon pou arete kòmanditè  ak agresè atak fizik gwoup milis ame majistra chèf wonflè a, Jan Gabriyèl Fòrtine alyas Astrèl Bejamen fè sou yo nan dat premye jen 2018 pase a.
 
Patisipan yo nan emisyon "Tribin Pèp" ki pase nan radyo Vwa Klodi Mizo, timachann yo fè konnen yo pran nan yon anbiskad bandi. Depi nan mèkredi 30 me pase a chèf eskadwon lanmò majistra Fòrtine te deja mande patizan li yo pran tout kalite zàm pou yo fè fas kare ak manifestan yo nan yon konferans li te bay nan vil la kèk èd tan anvan manifestasyon an. 
 
Malfra yo daprè AMMAFO jwenn yon kachèt ideyal ant kwa 4 chemin ak kafou Demapou, yon pakou lapolis te ba yo, se la menm yo sibi atak bandi yo. Kache dèyè konntenè ak nan lakou kèk kay, yo vide yon lapli kout wòch sou machann yo epi san krent fè aparisyon ak pankat pa yo, anba je kò UDMO a. Yo atake mizisyen Rara ki te akonpaye machann yo, kraze enstriman, tire anlè pou gaye foul la. Lapolis pran kouri kou popilasyon sivil la olye li afwonte nèg ame yo.
 
Atak ame sa a lakòz plizyè ti machann blese ak kout wòch, yo tonbe, tèt polisye kase, 3 manifestan arete, lari a boulvèse. Vyolans pwograme sa a tou met fen anvan lè l nan 4 triyèm jounen mobilizasyon machann mache kay fè Okay yo ki di mache a p ap kraze toutotan Konsèy Minisipal Okay la pa konstwi yon lòt pi gwo mache.  Konsèy Minisipal la dwe konstwi yon mache kominal ki reponn ak tout kondisyon yo epi remèt yo kle mache  a. Daprè yo si se pa sa, Mache Kay Fè p ap kraze. 
 
Branch bwa, pankat ak pawòl piman bouk, chante anba kout son pistòl akonpayman bann rara a se te sèl zam manifestan yo. Soti ak yon foul moun depi sou plas dàm lan ki ògmante cha pa anvan yo te al tonbe sou lapli kout wòch sa a ki tou kraze manifestasyon timachann yo ki te deja gen divès kalite pwoblèm.
 
Malgre  anpil moun nan popilasyon an idantifye agresè yo: Valeri Feliks ( Valéry Félix), Samil Jilyen( Samil Julien), Reginal ... sou lòd bandi ak kòl la, Gabriyèl Fòrtine, komisè gouvènman an Remon Bèrjo ( Raymond Bergeau) pa ko met aksyon piblik sou pye pou mande lapolis arete bandi yo yon mannyè pou yo ta reponn ak zak kriminèl sa a manifestan yo sibi anba grif yo. 
 
Timachann yo ki detèmine pou pwojè privatizasyon mache a pa rive sou yo anonse y ap kontinye okipe lari a pi rèd. Mòd leta sa a deja fin  debaba peyi a, yo p ap kite l fini ak ti rès la.
 
Maks -Enmbèr Marslen, VKM

Ajouter un Commentaire


Code de sécurité
Rafraîchir

OPEN

Wednesday - June 20, 2018

Weather: -273°C

 Winamp, iTunes      Windows Media Player      Real Player      QuickTime

Kiyès ki sou sit la

Nous avons 46 invités et aucun membre en ligne

Podcast radio vkm

 

Rechèch