• [javascript protected email address]

Radyo VKM an dirèk

Mouvman 22 Janvye / M22 ap suiv ak anpil kè sote, mezi kriminèl pouvwa Tèt Kale a vle pran pou monte pri gaz la yon lòt fwa ankò. Nan mwa ki sot pase yo, pouvwa a te siyen yon akò ak Fon Monetè Entènasyonal (FMI) pou ogmante pri gaz la, Privatize yon seri enstitisyon ak antrepriz piblik epi monte pri megawat kouran an nan kad yon pwogram ajisteman estriktirèl. N ap raple pwogram FMI yo se mizè, grangou, chomaj ak kriz yo pote nan tout peyi kote yo aplike.

Kidonk, pouvwa Jovenel Moise / Lafontant chwazi dirije pou FMI olye li dirije pou pèp la. Nou konnen aklè, se laboujwazi, kominote enperyalis la ak KEP koupyon Bèlanje ak akolit li yo ki mete ekip Tèt Kale a sou pouvwa a. Men, Mouvman 22 Janvye ap di yo pinga. Pèp la bouke bwè remèd chwal la. Depi preyidan Jovenel monte sou pouvwa a, se 5 gwo pwen ki nan pwogram li : 1) bay manti 2) Bay manti 3) bay manti 4) Bay manti 5) bay manti. Pèp la bouke ak pwogram manti a.

Olye pouvwa a pran mezi pou amelyore kondisyon lavi popilasyon an, se mezi pou pete fyèl pèp la l ap pran pandan l ap bay pèp la bwè te manti pou fè l dòmi. Pami mezi pete fyèl pouvwa a pran yo, gen bidjè kriminèl 2017-2018 la. Yon bidjè ki pèmèt pouvwa a pran plis lajan nan pòch pèp la, pandan yo kontinye ap bay boujwa yo plis franchiz epi simen sibvansyon tribò babò bay depite, senatè, minis, premye minis ak prezidan an limenm. Nan moman ouvriye yo t ap mande 800 goud pou salè minimòm, preyidan Jovenel chwazi mete sèlman 15 goud sou salè ouvriye yo. Preyidan an trete ouvriye yo tankou pòv k ap mande devan katedral. Lòt gwo mezi pouvwa a ap eseye pran, se mannèv pou voye rapò Petrokaribe a al dodomeya nan poubèl ak konkou palmantè petroraketè ki nan palman an. San konte lòt gwo mezi k ap pran nan divès zòn nan peyi a kote pouvwa a ap mache wete tè nan men peyizan yo pou bay gwo kapitalis fè antrepriz ak eksplwatasyon Min. Mezi pou ogmante pri gaz la yon lòt fwa ankò, se yon mezi ki vin mete apse sou klou.

Pandan mezi antipèp sa yo ap pran, nou konstate :

-      Pwofesè paka touche, minis edikasyon nasyonal la ki sanble fè doktora nan lekòl manti prezidan Jovenel la, kontinye ap blofe pwofesè yo, paran yo ak tout elèv yo ak yon seri mezi ki pa janm ka ateri

-      Grèv ap pete youn dèyè lòt nan divès enstitisyon nan Leta a pou mande bon kondisyon travay epi pou denonse privatizasyon enstitisyon ak antrepriz Leta yo (ladwann, OAVCT, Lopital piblik yo …)

-      Karavàn manti a bwè luil nan tout peyi a. Malgre tout lajan ki depanse nan karabann nan, sitiyasyon popilasyon an vin pi malouk. Manje vin pi chè epi pifò moun ki travay nan karavàn nan poko janm ka touche. Sa ki lakoz menm patizan pouvwa a oblije ap rele anmwe kont move lavi epi y ap mande prezidan an respekte pwomès li.

Pou tout rezon sa yo, Mouvman 22 Janvye kwè mezi pou ogmante pri gaz la pral mete plis gaz sou lestomak pèp la. Pou sa, olye pouvwa a monte pri gaz la, nou pwopoze :

1)    Pou pouvwa diminye kantite ministè yo ;

2)    Diminye kantite vwayaj k ap fèt pa si pa la, san gwo nesesite pou sa, sitou vwayaj yon seri gwo fonksyonè nan Leta a ap fè pou jere pèdiyèm ;

3)    Mete anba kòd, tout gwo chabrak, tout fonksyonè ki piye, volè lajan Petro Karibe a epi sezi byen mobilye, imobilye ak lajan yo gen labank.

4)    Diminye kantite franchiz dwanyè, ekzonerasyon fiskal gwo chabrak nan peyi a genyen ;

5)    Konbat tout bon kontrebann ak evazyon fiskal boujwazi raketè, revandèz la ak koutye boujwazi entènasyonal la ap fè nan peyi a ;

6)    Mete plis taks sou gwo antrepriz yo ;

7)    Kanpe sou yon seri akò mache lib nan peyi a kote leta ap pèdi yon pakèt milyon sou resèt ekstèn yo.

8)    Elimine yon seri sibvansyon ki pa jistifye nan bidjè a, tankou pil ak pakèt sibvansyon y ap bay depite ak senatè yo.

Kanta popilasyon an ak òganizasyon pwogresis yo, nou dwe ranfòse mobilizasyon an pou fòse pouvwa a fè bak sou mezi sa yo oubyen bay talon li. N ap pwofite okazyon sa a pou nou lanse yon pinga bay sendika jòn ak woz yo, pou dosye gaz la pa al negosye ankò sou do pèp la.

 

Pou Mouvman 22 Janvye :

 

 Guy Numa                   Domini Raisin            Jean-Wesner Noel

Ajouter un Commentaire


Code de sécurité
Rafraîchir

OPEN

Friday - May 25, 2018

Weather: -273°C

 Winamp, iTunes      Windows Media Player      Real Player      QuickTime

Kiyès ki sou sit la

Nous avons 8 invités et aucun membre en ligne

Podcast radio vkm

 

Rechèch