• [javascript protected email address]

Radyo VKM an dirèk

Nan dènye jou sa yo, se prèske chak jou moun nan popilasyon an ap viktim aksidan sikilasyon sou wout nasyonal yo kou segondè nan depatman Sid la. Dènye ki fè bri, enplike 3 etidyan sou moto, ladan l yon jenn fanm, ak yon machin sèvis Leta ki lakoz kondiktè moto a Samuel Théard ( Samyel Teyar) kouche nan mòg, lòt 2 yo sou kabann lopital.

Daprè enfòmasyon yo twa moun yo te al espante sou machin sa a ki t ap double yon lòt nan monte mòn Sika, komin Kavayon, vandredi 26 janvye 2018.  

Moto yo ki ta dwe pote yon okipan, 2 pou pi plis konn gen jiska 6 moun sou yo ap vire monte desann nan vil yo anba je otorite yo, selon yon responsab  nan lekòl k ap aprann moun kondi machin ki pale ak radyo Vwa Klodi Mizo jedi premye fevriye 2018 la. Pratik sa a redwi kapasite kondiktè a ki te ka epanye yon aksidan. Patikilye kou taksimann bliye si se yon veyikil ak motè ki nan men yo, chaje moto yo kou yon tibourèt ak tout kalite chay mete lavi pa yo kou tout moun k ap frekante wout yo andanje.  

Li kontinye pou l di se pisans moto yo ak gwosè a ki diferan : AYG150, DY125, 110CC aprè sa se prèske menm longè yo ye. Menm kwousen kote li wè k ap pote 3, 4, 5 moun yo, tout mezire 76 cm.  Kondiktè yo mete timoun, jenn chita sou tank kou sou pòt chay moto a, pa bay lavi timoun yo enpòtans kou Lapolis ki p ap pwoteje ak sèvi kominote a. Li kritike dènye desizyon ilegal lapolis sikilasyon Sid ki admèt 3 moun sou moto yo pou kondisyon ekonomik poze tèt li keksyon, kilè otorite yo te sansib konsa?

Depi kèk jou, yon sous nan lapolis la te enfome radyo a, Mario Aubertgiste ( Maryo Obejis) aktyèl DDS/PNH la, pral bay kondiktè yo kat blanch. Li pral pran desizyon dèyè do kòd sikilasyon an pou ogmante kantite pasajè yo tankou frè zam li, ansyen DDS/PNH Bruce Myrtil ( Bris Mirtil) te pran libète bay motosiklèt plak pa l nan depatman an. Si yo gen move pratik sa yo ki zak y ap pè komèt sou malere yo?

Se polisye Carl Édouard Noelizaire( Kal Edwa Nwelizè) mèkredi 31 janvye a nan konferans pou laprès,  konfime desizyon malonèt sa a epi pran kontrepey deklarasyon Pierre Louis Jean Baptiste ( Pyè Lwi Jan Batis), ajan 4, responsab sèvis la te fè nan mikwo VKM, lendi 29 janvye 2018 la sou sa lalwa di, responsablite yo nan sak gen pou wè ak veyikil ki chaje rèd.

Dapre chif ofisyèl yo, sèvis sikilasyon anrejistre karann twa mil sèt san venn twa (43723) motosiklèt nan depatman Sid la. Yon chif Pye Lwi Jan Batis di ki ka miltipliye pa 3 si enstitisyon li a te rive anrejistre tout moto yo, lage responsablite sa sou do Leta santral. Paske magasen moto yo anpil, vinn jwenn yo pa vann yo jan sa ta dwe fèt ki se remèt achtè a, veyikil li ak plak plis asirans. Chif yo estime, peyi a gen yon milyon senk san mil (1,500000 ) moto.

Sa gen plis ke 20 lane depi gwo popilasyon an nan vil Okay ap itilize mwayen deplasman sa a ki lajounen jodi blayi toupatou nan 69 seksyon kominal depatman an. Depi dat sa, ensekirite sou wout yo ogmante pi plis toujou. Lè se pa machin ak machin, se moto ak moto oubyen moto ak machin ki ap moulen pye, andomaje malere si yo pa mouri. Men okenn mezi dirab pa mete sou pye pou ta pwoteje gwo popilasyon an ki pran taksi moto pou plizyè rezon, ladan yo sikilasyon sitwayen yo ki se yon dwa kou lòt yo.

Pou lane 2017 la sèvis sikilasyon Sid di, li resanse 352 ka aksidan ki lakòz 106 moun mouri ak 703 lezòt blese. Komin ki nan pik la se : Okay 64, Aken 63, Kavayon 48, Senlwidisid 33, Tòbèk 31 epi Chantal fèmen lis la ak 2 ka aksidan.

Kòm Leta- prive sa a se pwojè klas dominan boujwa entènasyonal kou nasyonal yo, l ap pote nan zafè mache lib, komès san kontwòl, bouche je l sou gwo flewo sa yo k ap pote lavi malere- malerèz yo ale.

Si anviwonman ak sikilasyon nan yon peyi se yon faktè anplis pou montre angajman yon Leta sèvitè, pa bò isit, nan peyi Dayiti se yon mwayen ki pou montre ak ki mòd Leta payaya, sankoutya k ap dirije peyi a.

 

Maks- Enmbèr Marslen, VKM.

Ajouter un Commentaire


Code de sécurité
Rafraîchir

OPEN

Thursday - April 19, 2018

Weather: -273°C

 Winamp, iTunes      Windows Media Player      Real Player      QuickTime

Kiyès ki sou sit la

Nous avons 33 invités et aucun membre en ligne

Podcast radio vkm

 

Rechèch