• [javascript protected email address]

Radyo VKM an dirèk

Prezans polisye sèvis sikilasyon ki pa konstate sou wout yo nan depatman Sid la met sou sa reparasyon ranp kou enplantasyon pano sikilasyon yo san konte fòmasyon chofè yo se otan faktè ki lakòz aksidan yo ap kontinye rive dri dri nan vil Okay kou nan rès komin depatman an.

Lè se pa machin ki chaje twòp, pa an eta pou sikile akoz enspeksyon ki pa fè oubyen moto ki pote pliske 2 pasaje, se eksè vitès ki pwodwi aksidan grav sa yo sou pon Lilèt kou nan lòt zòn nan komin nan.

Vandredi 4 dawout 2017  la, bò 3:20 konsa nan aprèmidi se yon Toyota 4WD/ zo reken, ak plak OI- 00658 ki fè aksidan sa a. Machin  sa a  pote otokolan nasyon zini,  OCHA( Office for the Coodinasyon Humanitarian Affairs) United Nation nan lang angle, te soti nan direksyon vil la.

Daprè kèk temwen  kondiktè a t ap kouri anpil, ta sanble pèdi kontwòl machin nan ki kite wout la , fè loupin , travèse bèj la pou li al tonbe nan rivyè a kote sèl grenn moun ki ta sanble te nan machin sa a, chofè a, mouri.

Pou plizyè abitan nan site Jan Pòl 2 a, se pa jodi a aksidan sa yo ap rive nan kenpòt nan pwent pon Lilèt la. Men enstans ki la yo tankou: TPTC, Lameri ak Polis sikilasyon pa eseye vin ak okenn inisyativ pou evite repetisyon aksidan sa yo ki chak jou ap vin pi trajik toujou.

Si dirijan yo t ap voye je sou kèk malè ki pandye sou tèt popilasyon an, yo t ap wè bòdi anvan pon an rache, pa gen pano avetisè sitou pou vizitè yo ki se mezi sekirite anplis pou tout moun mande tèt yo konbyen sa yo ka koute? Dayè se yon gwo kamyon ki te fè aksidan la sa gen 3 lane ki rache yo. Lè sa si pa t gen bòdi sa yo se anba li te prale tou, selon sitwayèn sa a ki pale ak VKM.

Popilasyon an kritike lapolis ki te pran anpil tan pou rive sou plas aloske pon an sitiye ant 2 sou komisarya : 4 chemen ak Bèjo. Yo konstate tou se kèk moun nan popilasyon an ki plonje al eseye retire viktim nan ak zong yo san reyisi, mare kòd pou soti zo reken an nan dlo a tandiske chèf sèvis sikilasyon an ak lòt polisye ki selon dèvis yo se « Pwoteje ak Sèvi » t ap konstate menm jan ak rès popilasyon an mannèv sitwayen sèvitè sa yo.

Tout sa,  se egzanp pou popilasyon an konsyantize l sou veritab travay otorite yo epi pou l pran desten l paske dirijan yo pa mete anyen anplas pou pwoteje gwo popilasyon an. Alè isit se mèt kò ki pou veye kò.

Pon Lilèt kou pon Laravin fin kraze. Ou pa bezwen gen gwo konesans pou w wè sa. Sou bò gòch la, 7/23 ranp yo rache sou lòt bò a li manke 2. Epi sak ki kanpe yo fin pouri. Yon bon van p ap manke pa vide yo atè. Pou pon Laravin menm, depi lane pase ansyen minis defakto MTPTC Jacques Evelt Eveillard  deklare li manke pliske 90 boulon. Anyen pa ko janm fèt.

Yon lòt kote sèvis sikilasyon Sid la nan yon nòt ki pote dat 24 jiyè 2017 pase a, reyaktive dekrè ki te soti nan lane 2006 la, sa gen 11 lane, ki te entèdi machin 4 wou, tibis/ Pap padap ak kamyonèt/ Kabe yo fè transpò trajè Okay- Pòtoprens. Men 8 jou apre, Kabe ak Pap padap yo toujou ap asire trajè a san krent paske se polisye, jij, majistra, depite kou senatè ki pwopriyetè machin sa yo ki anpil fwa enplike nan gwo aksidan sou wout nasyonal nimewo 2 a.

 

Maks- Enmbèr Marslen( Max- Imbert Marcelin)/VKM

 

 

Ajouter un Commentaire


Code de sécurité
Rafraîchir

OPEN

Saturday - December 16, 2017

Weather: -273°C

 Winamp, iTunes      Windows Media Player      Real Player      QuickTime

Kiyès ki sou sit la

Nous avons 13 invités et aucun membre en ligne

Podcast radio vkm

 

Rechèch